Author: چوتھی دنیا

اتر پردیش کی سماجوادی سرکار عام انتخابات کے لیے ضابطۂ اخلاق نافذ ہونے سے پہلے اپنے سبھی مورچے مضبوط کر لینا چاہتی ہے، تاکہ انتخابی میدان میں عوام کے سامنے سماجوادی پارٹی کے حق میں مضبوطی کے ساتھ پیش بندی کی جاسکے۔ اس کے لیے ایک طرف نئے منصوبوں کے لیے سنگِ بنیاد رکھے جارہے ہیں، تو دوسری طرف تمامتر سوغاتیں بھی بانٹی جارہی ہیں۔ اسیسبب ایس پی کے تئیں وفادار نوکر شاہوں کی بجائے، اچھا کام کرنے والے، ایماندار اور محنتی بیورو کریٹس کو اہم عہدوں پر مامور کیا جارہا ہے۔ حکومت، انتظامیہ کا حساب کتاب درست کرنے کے لیے درجنوں آئی اے ایس، پی سی ایس اِدھر سے اُدھر کیے جاچکے ہیں۔ پی سی ایس سے ترقی پا کر آئی اے ایس بنے افسروں کو اہم عہدوں پر بیٹھا کر ان پر اعتمادکیا جا رہا ہے۔ سرکاری، نیم سرکاری، تربیتی اداروں اور باڈیز کے افسروں، ملازمین اور اساتذہ کو پروموشن، ایریر کی بقایا جات کی ادائیگی کر کے ریگولرائزیشن کے سہارے لبھایا جارہا ہے۔ سرکار سے لیکر تنظیم تک کی شبیہ کو بھی سلیقے کے ساتھ نکھارا جارہا ہے۔