حج 2018:عازمین حج کی روانگی کا سلسلہ14جولائی سے

makkah
دہلی اسٹیٹ حج کمیٹی سے جاری پریس بیانیہ کے مطابق حج بیت اللہ2018کے لیے عازمین حج کی روانگی کے پہلے مرحلے میں ملک کے سب سے بڑے امبارکیشن پوائنٹ اندرا گاندھی انٹر نیشنل ٹرمنل2-سے دہلی اور دوسری چھ ریاستوں اتر پردیش، ہریانہ، ہماچل پردیش،چنڈی گڑھ،پنجاب اور جموں کشمیر کے عازمین حج کی روانگی کا سلسلہ آئندہ14جولائی2018سے شروع ہو جائے گا۔اس موقع پر ہر سال کی طرح اس سال بھی دہلی اسٹیٹ حج کمیٹی کی جانب سے تمام ریاستوں کے عازمین حج کے عارضی قیام کے لیے دہلی کے تاریخی رام لیلا میدان اور مسجد و درگاہ فیض الٰہی میں تمام تر ضروری سہولیات پر مشتمل کیمپ کا افتتاح12جولائی2018کو رات8بجے حمدو نعت اور اسلامی تاریخ و روایات اور موضوعات پر مشتمل نظمیہ مشاعرہ سے ہوگا جس میں دہلی اور بیرونی دہلی کے معروف شعراء اپنے روح پرور کلام اور تخلیقات پیش کریں گے۔ اس موقع پر دہلی کی مختلف علمی و ادبی سماجی ومذہبی اور ملی تنظیموں، اداروں کے نمائندگان کے علاوہ معروف شخصیات نیز ائمہ و مدارس و مساجد کے ذمہ داران حضرات کو مدعو کیا گیا ہے۔
تقریب میں حکومت دہلی کے نائب وزیر اعلیٰ جناب منیش سسودیا،مہمان خصوصی ہوں گے، وزیر محصولات، حکومت دہلی جناب کیلاش گہلوت مشاعرہ کی شمع افروزی کریں گے جبکہ مہمان اعزازی جناب محبوب علی قیصر، ایم پی و چیئرمین حج کمیٹی آف انڈیا اور جناب عمران حسین وزیر خوراک و رسد، حکومت دہلی ہوں گے۔مشاعرہ کی صدارت دہلی کے بزرگ شاعروقار مانوی فرمائیں گے،افتتاحی کلمات پروفیسر شہپر رسول، وائس چیئرمین دہلی اردو اکادمی پیش کریں گے۔نظامت کے فرائض کی انجام دہی جناب معین شاداب کریں گے۔دہلی اسٹیٹ حج کمیٹی کی جانب سے مذہبی اور اسلامی موضوعات کی نظموں پر مشتمل اس مشاعرہ کا انعقاد در اصل کمیٹی کی جانب سے حج منزل اور دہلی کے مختلف علاقوں میں لگائے گئے حج تربیتی کیمپ کی اختتامی تقریب کے طور پر بھی کیا جارہا ہے جس کے بعد 14؍جولائی2018 سے حج پروزوں کی مبارک روانگی کا سلسلہ شروع ہو جائے گا۔واضح ہوکہ اس سال دہلی سے تقریباً 20000عازمین کل48پروازوں سے حج بیت اللہ کے مقدس سفر کے لیے روانہ ہوں گے جس کا سلسلہ 14؍جولائی سے شروع ہوکر28؍جولائی تک جاری رہے گا۔
Share Article

Leave a Reply

Your email address will not be published. Required fields are marked *